30 години насмевки, доверба и посветеност!

Оваа година со гордост и возбуда го славиме нашиот 30-годишен јубилеј! Три децении исполнети со напорна работа, посветеност и најважното – со вашите насмевки, кои се најголемата награда за нашиот труд.

Од нашите скромни почетоци на 08.03.1995 година, до денешниот ден, нашата цел секогаш била иста – да обезбедиме врвна стоматолошка грижа во пријатна и доверлива средина. Со текот на времето, не само што ја усовршувавме нашата работа и воведувавме нови технологии, туку и градевме искрени и долготрајни односи со вас, нашите верни пациенти.

Во текот на овие 30 години, низ нашата ординација поминаа илјадници пациенти – некои од нив дојдоа како деца, а сега ни ги доведуваат и своите семејства. Оваа доверба што ни ја укажавте е нашата најголема мотивација да продолжиме со уште поголема посветеност.

Ви благодариме!

Без вас, ова патување немаше да биде возможно. Вашата поддршка, вашите препораки и вашата насмевка се она што нѐ води напред. Секој ден се трудиме да ви обезбедиме најдобра стоматолошка грижа, бидејќи вие го заслужувате најдоброто.

Исто така, да не ги заборавиме и сите наши соработници и партнери. Огромна благодарност и до вас. Вашата професионалност и соработка се многу важен дел од нашата работа. Без вас, немаше да бидеме онаму каде што сме денес.

Овој јубилеј го славиме со многу радост, но и со амбиција за иднината. Продолжуваме да растеме, да се усовршуваме и да ви нудиме уште подобри услуги, со иста љубов и посветеност како првиот ден.

Ви благодариме што сте дел од нашата приказна! Со нетрпение очекуваме уште многу години исполнети со здрави, среќни насмевки!

Со благодарност,
Тимот на ПЗУ д-р Доневски

The post 30 години ПЗУ д-р Доневски appeared first on ПЗУ Др. Доневски.

Коронки (навлаки) се фиксни протетски надоместоци, вградени на еден заб или на забен имплант, кои ја покриваат забната коронка и и даваат еден нов, потполно природен изглед. Целта на една коронка (навлака) е да ја замени забната коронка која е оштетена од кариес, или забот е третиран еднодонтски.

Мостовите се вградуваат при недостаток на еден или повеќе заби, при што се состружуваат соседните заби и на нив се додава забот кој недостига во забниот низ.

Во зависност од тоа дали се потполно или делумно изработени од керамика, коронките ги делиме на метало-керамички коронки и безметални коронки.

Метало-керамички коронки

Металокерамичките коронки имаат надворешен дел од керамика, додека средишниот дел помеѓу забот и керамиката е од метал. Кај овие навлаки металната основа се изработува рачно, а за разлика од нив, Безметалните коронки се изработуваат машински (со CAD-CAM технологија), а со самото тоа и попрецизно се изработени.

Безметални коронки

Со безметалните коронки е можно да се постигне многу подобар ефект, што значи дека коронката изгледа во потполност како природен заб. Тоа што немаат метал како основа е причината за подобра проѕирност и природен изглед.

Безметалните коронки на циркониумска основа (Full Zirconia) I E-max безметалните коронки кои се употребуваат во нашата ординација се потполно биокомпатибилни (не предизвикуваат алергиска реакција).

Метало-керамичките коронки со тек на време (после 10 до 15 години) може ( но и не мора) да доведат до просветлување на металот, при што е потребна замена на истите.

Комбинација од метало-керамички и безметални коронки.

Се ова претходно напишано е предност за безметалните коронки. Меѓутоа, имајќи во предвид дека се повеќе од 2 пати поскапи од метало-керамичките коронки (7000 денари наспрема 3000 денари од коронка), многу пациенти се решаваат за комбинација од двата вида коронки. Најчестата комбинација е да се стави безметални коронки во предната регија (естетската регија) од 3 до 3, а страничните регии да бидат метало-керамички навлаки.

The post Метало-керамички vs Безметални коронки appeared first on ПЗУ Др. Доневски.

Иако постојат повеќе начини за замена на заб кој недостасува, сепак ниту еден друг начин не се покажал толку ефикасен и долготраен како користењето на имплантите. Во одредени случаи, имплантите се и единствен избор за обнова на сите потребни функции на забот. Тие се применуваат кај луѓе кај кои постои напредна пародонтопатија, односно расклатување на забите, исто така поради неуспешно лечење на забот. Во некои случаи, кога пациентот нема ниту еден заб во горната или долната вилица, имплантите се единствена можност за добивање на фиксна надокнада (мост).

Предности

Имплантите можат да надокнадат еден или повеќе заби без да се стругаат соседните заби, како што е случајот со поставување на мост. Тие исто така, можат да послужат и како носачи за протеза, при што протезата е многу постабилна и поудобна за носење. Имплантите на ниту еден начин не ја нарушуваат функцијата на соседните заби, нешто што може да се случи при поставување на забните мостови. За разлика од забните протези, кои ствараат непријатно чувство на страно тело во устата, пациентот воопшто не чувствува никаква разлика помеѓу природен заб и оној со вграден имплант. Многу важно е да се знае дека имплантот цврсто сраснува за виличната коска, со што се спречува губитокот на коска и повлекување на гингивата околу имплантот. Исто така со имплантите се постигнува и висока естетика, што допринесува за пораст на самодовербата кај пациентот.

Тек на операцијата

Самата процедура на поставување на имплантот се изведува под локална анестезија и е потполно безболна. Неколку часа после операцијата можно е појава на болка во пределот на поставување на самиот имплант, која поминува со употреба на аналгетици. После имплантацијата во виличната коска, имплантот се остава да се врзува за коската 3 до 4 месеци, време за кое не би требало да се оптеретува со привремена или дефинитивна порцеланска навлака. После 3 до 4 месеци се врши ослободување на имплантот и поставување на Гингива формер, кој стои во устата 10 до 14 дена, по што се зема отпечаток од устата на пациентот и се поставува дефинитивната керамичка навлака.

После третманот

На пациентите кај кои се поставени еден или повеќе импланти, им се препорачува поголема хигиена на забите, за да не настане воспаление на гингивата околу имплантите. Исто така, се препорачува, еднаш до двапати годишно, пациентот да го посетува својот стоматолог и да се прават редовни контроли на кои ќе се следи ситуацијата со имплантите. Според истражувањата, 93 до 97 % од имплантите функционираат и после 10 години од нивното вградување. Токму затоа имплантите се сметаат за едни од најдобрите стоматолошки процедури со долгорочна прогноза за успех.

Кликнете на линкот за да видите еден случај од нашата пракса https://www.facebook.com/226650554445752/posts/1218220928622038/

The post Што се забни импланти? appeared first on ПЗУ Др. Доневски.

Млечните (бебешки) заби почнуваат да никнуваат од 6 месец па се до 2 или 3 година. Со тек на време, овие млечни заби се заменуваат со трајни заби- од 6-тата година, преку пубертетот, до 21-та година кога би требало да никнат последните заби во устата- умниците. Млечни заби се вкупно 20 на број и тие се заменуваат со трајни заби кои се вкупно 32. На сликата подолу можете да го видите периодот во кој никне секој заб посебно.

Млечните заби имаат многу важна улога во развивањето на вилиците на еден човек. Тие им помагаат на децата не само да јадат, туку и чуваат место во вилиците за поголемите трајни заби кои ќе дојдат на нивно место. Имаме 10 млечни заби во горната и 10 млечни заби во долната вилица. Кога никнат трајните заби, завршуваме со по 16 заби во двете вилици, односно вкупно 32 заба.

Кога никнуваат трајните заби?

Трајните заби никнат по ист редослед со млечните заби. Најпрвин долните предни заби (инцизивите), па горните предни заби и потоа се оди редоследно кон назад кон моларите. Најчесто, првите млечни заби кои никнат се и први заби кои паѓаат и се менуваат со трајни заби. Исклучок од ова е, се разбира, доколку се оштети некој млечен заб, дали од кариес или од некој удар, па мора да биде изваден предвреме. На оваа слика пак, се гледа на која возраст никнуваат трајните заби. Најчесто, млечните заби кај децата почнуваат да се расклатуваат и вадат кога тие тргаат на училиште, на 6 годишна возраст. Промената на млечни заби во трајни се случува до 12 или 13 годишна возраст. Најпрвин се менуваат централните инцизиви, па латералните инцизиви, па канините и на крајот премоларите и моларите.

Последни трајни заби кои никнат и доколку никнат, се третите молари, попознати како умници. Може да се случи тие да не изникнат во вилицата, доколку нема доволно простор, или заради било која друга причина. Најчесто никнат од 17 до 21 година од животот. Посетете го Вашиот стоматолог да ги прегледа забите и да Ви каже дали имате умници и дали треба да бидат извадени. Како што никнуваат трајните заби, задолжително е редовна посета на стоматолог 2 пати годишно за да имате здрави заби.

The post Млечни и трајни заби. Што треба да знаете? appeared first on ПЗУ Др. Доневски.