Оралната имплантологија е гранка на стоматологијата која се занимава со дијагностика и поставување на забни импланти со цел враќање на изгледот, функцијата, естетиката, комфорот, говорот и здравјето на потполно или делумно беззабите пациенти.
Забните импланти претставуваат титаниумски конструкции кои се вградуваат во виличната коска и се замена за коренот за забот кој недостасува. Тие можат да се вградат во горната или во долната вилица, а со тек на време (3 до 4 месеци) се создава јака врска помеѓу коската и имплантот.
Титаниум е материјалот од кој се изградени забните импланти. Тој е во потполност биоинертен, што значи дека организмот не го препознава како страно тело и со тоа не постои можност за негово отфрлање.
Забниот имплант се состои од 3 дела:
- Титаниумски дел кој се вградува во виличната коска
- Абатмент (Надоградба) кој се зашрафува за самиот имплант
- Коронка која се поставува на надоградбата
Забниот имплант нуди неколку предности во однос на другите можности за замена на заб. Освен што изгледаат и функционираат како природен заб, имплантите ги заменуваат забите без “жртвување” на соседните заби. Имено, во случај на замена за еден заб со мост, неопходно е стругање на соседните заби.
Самата процедура на поставување на имплантите трае 3 до 4 мецеси. Најпрвин се поставува титаниумскиот имплант на местото на извадениот заб, потоа се чека 3 месеци за негова остеоинтеграција (припојување на имплантот за коската). Потоа се става гингивоформер, кој стои една недела, со цел да се оформи гингивата околу самиот имплант. Претпоследната фаза е поставување на абатменот (продолжетокот), за на крај да се постави коронката.
Кога се вградуваат забни импланти?
- Кога имаме недостаток на еден заб а околните заби се здрави или со мали пломби, вградувањето на имплант е идеално решение. Во такви случаи се избегнува потребата за стругање на соседните заби, изработка на керамички мостови.
- Забни импланти кај недостаток на повеќе заби во една вилица. Со поставување на 2 или повеќе импланти во беззаба регија се создава добра основа за изработка на мостови со што многу успешно се елиминира потребата за носење на вештачки вилици.
- Забни импланти кај недостаток на сите заби во вилицата. Со поставување на 6 импланти во една вилица се добива можност за изградба на фиксна мостова конструкција со што ќе се избегнат нелагодностите на носење на тотална мобилна протеза.
- Поставување на 4 мини импланти во беззаба вилица и потоа прикачување на тотална мобилна протеза за имплантите, при што таа има поголема цврстина и стабилност.
Во нашата ординација се поставуваат импланти од Фирмата Schuetz Dental од Германија, едни од водечките на европскиот пазар.
